[[@YHRK]] [[@Spiritual]]

Ganapathi Upanishad
Languages: Telugu and Sanskrit
Script: TELUGU
Sourcing from Upanishad Udyȃnavanam - Volume 4
Translation and Commentary by Yeleswarapu Hanuma Rama Krishna (https://yhramakrishna.com)
NOTE: Changes and Corrections to the Contents of the Original Book are highlighted in Red
REQUEST for COMMENTS to IMPROVE QUALITY of the CONTENTS: Please email to yhrkworks@gmail.com

ఏకదంతాయ విద్మహే  
వక్రతుణ్డాయ ధీమహి।  
తన్నో దంతిః ప్రచోదయాత్।  

ఏకదంతం చతుర్హస్తం  
పాశమ్ అంకుశ ధారిణమ్।  
రదంచ వరదం హస్తైః  
బిభ్రాణం మూషికధ్వజం।।

(అన్యపాఠము)  
ఏకదంతం చతుర్హస్తం  
బిభ్రాణం పాశమ్ - అంకుశమ్।  
అభయం వరదం హస్తైః  
దధానమ్। మూషిక ధ్వజమ్।।  

ఉపనిషత్ ప్రారంభం

స్తుతి :
యన్నత్వా మునయస్సర్వే నిర్విఘ్నం యాతి తత్పదమ్।
‘గణేశోపనిషత్’ వేద్యం తత్ బ్రహ్మైవాస్మి సర్వగమ్।

మునులంతా కూడా ఎవరికి నమస్కరించి ‘తత్‌పదము’ చేరటానికై సమస్త విఘ్నములను ‘‘నిర్విఘ్నము’’గా చేసుకోగలుగుచున్నారో, అట్టి ‘‘గణేశోపనిషత్’’ను అధ్యయనము చేస్తున్నాము. ఈ అధ్యయనముచే ‘‘సర్వగతమగు బ్రహ్మమే నేనై ఉన్నాను’’ - అని అవిఘ్నముగా స్వానుభవము చేసుకొనగలము.

ఓమ్…। ఓం లం। నమస్తే గణపతయే। సమస్త లోకములలోని గణములకు పతి (The Main Leader of all Groups) అయిన మీకు నమస్కారము.
ఈ జగత్తు రూపంగా కనిపిస్తున్నది మీరే కనుక నాకు ‘‘త్వమ్-నీవు’’గా కనిపించేదంతా మీరే। త్వమేవ ప్రత్యక్షం తత్త్వమసి। ఈ జగత్తంతా కలిపి మీ స్వరూపమే అయి ఉన్నది. తత్ త్వమ్ అసి।।
- మీరు కేవల (Absolute) స్వరూపులై ఈ జగత్తులన్నిటికీ కర్త (The worker of the Universe) అయి ఉన్నారు.
- ఈ లోకాలన్నీ ధారణ చేయుచున్నట్టి ‘‘ధర్త’’ మీరే। ధరించువాడవు (All this is your ornament).
- ఈ సమస్తము ఒకానొకప్పుడు మీయందే లయమౌతోంది. కాబట్టి దీనికంతటికీ లయకారులు కూడా మీరే। (It dissolves in You only)
- ఈ సమస్తము బ్రహ్మమే అయి ఉండగా, అట్టి బ్రహ్మము మీరే అయి ఉన్నారు. త్వమేవ ఖల్విదం బ్రహ్మాసి।
- మీరు సాక్షాత్తు ఆత్మస్వరూపులు।

బ్రహ్మజ్ఞులగు మహనీయుల స్వానుభవమగు ఋతమును, సత్యమును గమనించి-‘‘మీరు మాత్రమే నిత్యము। త్రికాలములలో సర్వదా సర్వత్రా వేంచేసినవారై ఉన్నారు’’ - అని ఎలుగెత్తి గానము చేస్తున్నారు.

స్వామీ! గణపతి దేవాదిదేవా। ఈ సంసార కూపము నుండి, భవబంధముల నుండి నన్ను రక్షించండి.

అట్లాగే మాకు ప్రవచనములు ప్రవచించి, మా ‘అజ్ఞానము’ - అనే దుమ్ము దులుపుచున్న వక్తారులను (మాకు ఆత్మబోధ ప్రసాదిస్తూ ఉన్న గురువులను) కూడా కరుణతో రక్షించండి. ఆత్మ ప్రవచనములు వింటున్న శ్రోతలగు మమ్ములను రక్షించండి. అధ్యయనులగు వేదమును ధారణ చేయుచున్న సహ-శిష్య జనులందరిని రక్షిస్తూ ఉండండి.

గణపతి భగవాన్! మీకు ముందునుండి, వెనుకనుండి, ఎడమ నుండి, కుడినుండి, పశ్చిమ-ఉత్తర వైపుల నుండి, పై నుండి, క్రింద నుండి, - అన్ని వైపుల నుండి నమస్కరిస్తున్నాము. అన్ని వైపులుగా, సర్వదిశ-ఉపదిశల నుండి మమ్ము కాపాడండి. (సంసారసాగరము నుండి) రక్షించ వేడుకొంటున్నాము. సాంసారిక భ్రమలు అన్నివైపులా విస్తరించి మమ్ములను లాగుచున్నాయి కదామరి? మీరే మాకు దిక్కు।

హే విఘ్న వినాయకా! మహాగణపతీ! వాక్ స్వరూపడవు. వాక్కుగా విస్తరించియున్నది మీరే! వాఙ్మయుడవు. వాక్కుకు అధినేతవు.

సమస్తము మీ యొక్క ‘ఎరుక (Knowing)’ అను విశేషము నుండియే విస్తరిస్తోంది కాబట్టి చిన్మయ - స్వరూపులు. ఆనందమయులై ఈ సమస్త లోకములను కల్పించుకొని మీకు మీరే వినోదిస్తున్నవారు.

‘బ్రహ్మము’ స్వరూపము కలవాడవై బ్రహ్మమయుడవు. ‘‘ఉనికి - ఎరుక - అనుభూతి’’ (“Presence - Awareness - Experience” Absolutely) స్వరూపుడవు, సర్వ జీవులలో అట్టి సచ్చిదానంద స్వరూపులై, సమస్త జీవుల సహజ స్వరూపమై వేంచేసి ఉన్నారు కాబట్టి సమస్తము మీకు ద్వితీయము కాదు. మీరు అద్వితీయులు. ఓం అద్వితీయాయ నమః। ‘‘అహమ్-త్వమ్-ఇదమ్’’లతో కూడిన ఈ సమస్తము మీకు అనన్యము.

త్వం ప్రత్యక్షం బ్రహ్మాసి। ఈ సమస్తము మీ జగత్ రూప చమత్కారమే. ఈ సమస్త జగద్దృశ్యము మీ యొక్క ప్రత్యక్ష పరబ్రహ్మ స్వరూపమే। ఇక్కడ సందర్భపడుచున్న, ‘‘ద్రష్ట-దర్శనము-దృశ్యము’’ - మీయొక్క సంప్రదర్శనమే।

‘‘తెలుసుకొనువాడవు - తెలియబడుచున్నదీ’’ కూడా అయి, జ్ఞాన విజ్ఞానమయులై ఉన్నది మీరే. జ్ఞానముగా తెలుసుకొనుచున్నది, విజ్ఞానముగా తెలియబడుచున్నది కూడా మీరే!

ఓ సృష్టి స్థితి లయ కారకా! పరిపోషకా!
జలంలో తరంగం బయల్వెడలి, జలములోనే స్థితి కలిగి ఉండి, జలములోనే లయించు తీరుగా - ఈ సమస్త జగత్తు మీనుండే ఉదయిస్తోంది. మీయందే స్థితి కలిగిఉంటోంది. మీయందే లయిస్తోంది కూడా। సర్వం జగదిదం త్వత్తో జాయతే। సర్వం జగదిదం త్వత్తః తిష్ఠతి। సర్వం జగదిదం త్వయి లయమ్ ఏష్యతి।। ఇదంతా మీచేతనే పరిపోషించబడుతోంది. సర్వం జగదిదం త్వయి ప్రత్యేతి। ఈ జగత్ వ్యవహారమంతా మీపై ఆధారపడినదై ఉన్నది. మీరు మాయొక్క ‘పరస్వరూపమే’ అయి ఉన్నారు. మేమంతా మీ అభ్యంతరరూపులమే! మేమంతా మీరే అయి ఉన్నాము, స్వామీ!

త్వం భూమిః ఆపో అనలో అనిలో నభః।
మీరే భూ-జల-అగ్ని-వాయు-ఆకాశ పంచభూత సంప్రదర్శనులై వేంచేసి ఉన్నారు.

త్వం చత్వారి వాక్ పరిమితా పదాని।
మీరే చతుర్విధ (4) రూపకమైన వాక్కు స్వరూపులు.

మాలోని భాష - ఆలోచన - భావన - సంకల్ప → చతుర్వాక్కు రూపములు మీరే అయి ఉన్నారయ్యా!

త్వం గుణత్రయాతీతః।
త్రిగుణములు మీయొక్క స్వభావ చమత్కారములు. అయినప్పటికీ కూడా, - సత్వ రజో తమో గుణములకు ముందే ఉన్న ‘‘గుణి’’, ‘గుణి’కి ముందే ఉన్న ‘‘నిర్గుణి’’ స్వరూపులు. గుణత్రయాతీతులు.

త్వం అవస్ధాత్రయాతీతః।
జాగ్రత్ స్వప్న సుషుప్తులు లీలగా కల్పించుకొనుచూ ఆస్వాదించువారు. ఆ మూడిటిని సిద్ధింపజేసుకొనే సిద్ధపురుషులు. ఆ మూడు తమ సంచార స్థలములుగా కలిగియున్న తురీయ స్వరూపులు. అంతేకాకుండా ‘కేవలసాక్షి’ అగు తురీయాతీతులు కూడా।

త్వం దేహత్రయాతీతః।
మీరు భౌతికమగు స్థూలదేహమునకు, భావనరూపమగు సూక్ష్మదేహమునకు, అభ్యాసనిర్మితమగు సంస్కార-వాసనల రూపమగు కారణదేహమునకు ఆవలివారు. ఆ మూడు దేహములను (జడవస్తువులను కదల్చు చేతన శక్తివలె) చైతన్య పరచు ఆత్మాకాశ స్వరూపులు. జగత్-వస్తువులను కనిపింపజేయు విధంగా - త్రిదేహములు మీయొక్క ఆత్మతేజస్సునందు వెలుగొందు వస్తువులు.

త్వం కాలత్రయాతీతః।
హే గణేశ్వరా! మీరు భూత-భవిష్యత్-వర్తమానములకు (త్రికాలములకు) ఆవలివారు. అంతేగాని కాలములోనివారు కాదు. కాలబద్ధులు కారు. కాల నియామకులు (స్వప్నములోని కాల గతికి కాలనియామకుడు - స్వప్నము తనదైన వాడే కదా!). కాలః కాల స్వరూపులు! త్రికాలములలోను యథాతథ స్వరూపులు.

త్వం మూలాధారే స్థితోఽసి నిత్యమ్।
మీరు ప్రతి జీవుని మూలాధార చక్రములో వేంచేసినవారై, యోగాభ్యాసకులకు మార్గదర్శకులు, గురువులు అయి ఉన్నారు. సమస్తమునకు మూలాధారులు (The Basic Holding) అయి ఉన్నారు.
(భూః-భువః-సువః) - త్రిలోకములకు మూలాధారులై, కళ్యాణ స్వరూపులుగా వాటిని ప్రదర్శిస్తున్నారు. (మూలాధారే హుత వ హ కళా, విశ్రుతాః ‘బూర్భువః స్సువః।) త్రిలోకములు మీనుండి ప్రదర్శనమగుచు, సమస్తమునకు ‘ఆధారుడు’ అయి ఉన్నారు.

త్వం శక్తిత్రయాత్మికః।
జగన్నిర్మాణమునకు త్రయీ శక్తులగు ఇచ్ఛా-జ్ఞాన-క్రియా శక్తుల ఆత్మ స్వరూపులు మీరే! (తత్ దైవీస్వరూపములగు సరస్వతీ - లక్ష్మీ - పార్వతీ) శక్తిశ్వరూపులై ఉన్నారు. సమస్త జీవులకు శక్తిత్రయమును ప్రసాదించువారు.

త్వం యోగినో ధ్యాయంతి నిత్యమ్।
సర్వాత్మకుడవు. పరమాత్మవు అగు మీ గురించియే యోగాభ్యాసులు, యోగసిద్ధులు నిత్యము ధ్యాసతో ధ్యానించుచున్నారు. మీయొక్క ఉపాసనచే ఈజీవుడు పరమాత్మతో సంయోగము పొందగలడు.

మీరే - సృష్టికర్త అగు బ్రహ్మ। పరిపోషకులు, సంరక్షకులు అగు విష్ణువు। లయకారులగు రుద్రుడు। ఇంద్రియములకు అధినేత అగు ఇంద్రుడు। సర్వమును దహించుచూ, దేహములను రక్షించు అగ్నిహోత్రుడు। సమస్తమునకు చలనము కలిగిస్తున్న వాయువు। కిరణములతో సమస్తము తేజోమయము, జీవన్మయము చేస్తున్న సూర్యుడవు। జీవులకు ఓషధి- వనస్పతి (ఆహార) ప్రదాత అగు చంద్రమసుడవు।

త్వం బ్రహ్మ భూర్భవః స్వః’ ఓం
భూ-భువ-సువర్లోకముల రూపము దాల్చిన ఓంకార సంజ్ఞార్థమగు ‘బ్రహ్మము’ మీరే అయి ఉన్నారు.

‘గం’ అనే పదమునకు ప్రణవమంత్రము (ఓం)ను ముందుగా చేర్చి (‘ఓం - గమ్….’) - మంత్రమును ఉచ్చరిస్తూ ఉండగా, అట్టి మంత్రోపాసనకు (అభ్యాసికి) గణేశుని సాక్షాత్కారము లభించగలదు.
ఋషి → గణకుడు।
ఛందస్సు → నృచత్ గాయత్రీ ఛందస్సు।
దేవత → శ్రీ మహాగణపతి।

ఏక దంతాయ:
జన్మజన్మలుగా వృద్ధి చేసుకుంటూ వస్తున్న ‘అనేకము’ (Multiplicity) అనే వ్యసనము పొందియున్న మా బుద్ధికి, అట్టి జాడ్యము తొలగించి, ‘ఏకత్వము’ ప్రసాదించు, స్వామి! ఒక్క దంతమేగల ఏకదంత- గణపతి. అనేకముగా కనిపిస్తున్న ఈ జగద్దృశ్యమును ఏకముగా అనిపించగలుగు మనో - బుద్ధులను ప్రసాదించగలుగు దేవాది దేవుడు శ్రీ మహాగణపతి। అందుచేతనే ఏకదంతుడు।

‘‘ఓం ఇతి ఏకాక్షరం బ్రహ్మ’’।
- ‘‘ఇదంతా ఏకము-అక్షరము అగు బ్రహ్మమే’’- అను స్థానమునకు మార్గము చూపువారు. ఏకదంతుడు.

విద్మహే।
శ్రీ గణపతి యొక్క మహిమను ఎరుగుచున్నాము.

వక్రతుండాయ :
‘‘ఓం’’ - ప్రణవస్వరూపుడు. సర్వాత్మకుడు. ‘తత్త్వమ్’ సంజ్ఞాస్వరూపుడు.
‘ఓం’ కార సంజ్ఞ అగు ఆకారముతో కూడిన తుండముతో ఈ సమస్తమైన ‘అన్యము’ను అనన్యములోనికి పీల్చివేయువారు.

ధీ మహి :
ఆయన మహిమను బుద్ధితో ధ్యానించుచున్నాము.

తన్నో దంతిః ప్రచోదయాత్ :
‘ప్రజ్ఞ’కు సూచకమగు ఏనుగు శిరస్సును కలిగియుండి, ‘తత్’ స్వరూపుడగు శ్రీ గణపతి మా బుద్ధులను ‘తదాత్మజ్ఞానము’ వైపు ప్రేరేపించెదరు గాక। ప్రత్యుత్సాహపరచెదరు గాక।

నిరాకారుడు, సమస్త నామరూపములు తానే అయినవాడు అగు మహాగణపతి ఆశ్రివత్సలుడు. ఆరాధించువారి పట్ల గల అవ్యాజమైన ప్రేమచే సాకారరూపము ధరించి బాహ్య-అభ్యంతర- హృదయాంతర్గతములలో సాక్షాత్కరిస్తున్నారు.

అట్టి ఉపాస్య సాకార గణపతి రూపమును అభివర్ణించుకుంటున్నాము.

ఏకదంతమ్ :
(తన రెండు దంతములలో ఒకదానిని పెరికి లోకకంటకుడగు మూషికాసురుని సంహరించి లోకకళ్యాణము ప్రసాదించి) ఒక దంతము కలిగియున్నవారు (ఏకత్వము ప్రసాదించువారు). మ-ఉషికేతి మూషికః। ‘‘నాది-నాకు చెందినది’’ - అను మమకారమును వశము చేసుకొని, ఈ జీవునియొక్క మమకారమును ఆత్మభావనకు వాహనమాత్రంగా తీర్చిదిద్దువారు.

చతుర్హస్తం :
నాలుగు చేతులు కలవారు - భక్తి యోగ జ్ఞాన వైరాగ్యహస్తులు. (కర్మ-భక్తి-జ్ఞాన-ముక్తులు చేతులుగా కలవారు)

పాశమంకుశ ధారిణమ్ :
ఒక చేతితో పాశము (ప్రేమపాశము) ధరించినవారు. రెండవ చేతితో దుష్టగుణములు తొలగించు అంకుశము చేబూని ఉన్నవారు. (Loving and correcting).

వరదం హస్తైః బిభ్రాణం (దధానం) :
మిగిలిన రెండు చేతులతో వరద (వరప్రసాద) - అభయ (భయమునుపోగొట్టు) ముద్రలను ధరించువారు.

మూషక ధ్వజమ్ :
మూషిక(ఎలుక) ధ్వజము కలిగియున్నవారు. సమస్తము ప్రసాదించు ప్రకటన కలవారు.

రక్తం :
ఎర్రటి ఛాయగలవారు. (కార్యక్రమములందు ఉత్సాహము కలిగియుండు సంజ్ఞగా వేంచేయువారు).

లంబోదరం :
(సమస్త విద్యలు గల) పెద్దపొట్ట గలవారు.

శూర్పకర్ణకం :
పెద్ద చెవులు కలవారు. (చక్కటి శ్రవణ శక్తిని మాకు ప్రసాదించువారు).

రక్త వాససమ్ :
ఎర్రటి వస్త్రములు ధరించినవారు.

రక్త గంధానులిప్తాంగమ్ :
శరీరమంతా ఎర్రచందనము పులుముకొని యున్నవారు.

రక్త పుష్పైః సుపూజితమ్ :
భక్తులచే మందారము మొదలైన ఎర్రటి పుష్పములతో పూజింపబడువారు. స్వధర్మ పుష్పములు స్వీకరించి ‘ముక్తి’ని ప్రసాదించువారు.

భక్తానుకంపినమ్ దేవమ్ :
భక్తులపై అనుగ్రహము కురిపించు ఆదిదేవుడు.

జగత్కారణమ్ :
జగత్తు యొక్క పుట్టుకకు కారణభూతులు. ఈ సమస్త దృశ్యము యొక్క జనన-గతి-లయములకు కారణము, ఆధారము కూడా అయి ఉన్నవారు.

అచ్యుతమ్ :
సమస్తమును ఆత్మస్వరూపముగా దర్శించుటయందు ‘చ్యుతి’ (Distraction) ఏ మాత్రము లేనట్టివారు. సర్వదా పరబ్రహ్మస్వరూపులు. అచ్యుతత్వము భక్తజనులకు ప్రసాదించువారు.

ఆవిర్భూతం చ సృష్ట్యాదౌ :
సృష్టికి మునుమందే ఉన్నట్టివారు. లీలావినోదులై ‘సృష్టి’ రూపంగా ఆవిర్భవించువారు.

ప్రకృతేః పురుషాత్ పరమ్ :
ప్రకృతికి ఆవల పురుషుడై వెలుగొందువారు. స్వభావమునకు ‘స్వభావి’గా ప్రకాశమానులు.

ఏవం ధ్యాయతి యో నిత్యం స యోగీ యోగినాం వరః।
అట్టి మహాగణపతిని ఎవరు నిత్యము ధ్యానిస్తూ ఉంటారో,… అట్టి వాడు యోగులలో ‘శ్రేష్ఠుడు’ అవుతాడు.

వ్రాతపతీ! (సమూహనాయకా!) (Group Leader)! దేవతలకు అధిపతీ! గణపతీ! ప్రమథ గణపతీ! లంబోదరా! ఏకదంతా! విఘ్ననాశా। శివసుతా! వరప్రదాతయగు వరదమూర్తీ! నమో నమో నమో నమః।।

అథర్వ మహర్షి సందర్శితమైనట్టి ఈ ‘‘అథర్వ శిరము’’ను అధ్యయనము చేయువాడు ‘‘బ్రహ్మతత్త్వము’’ నందు ప్రవేశించగలడు. అంతటా సుఖవంతుడు కాగలడు. ఆత్మసుఖి కాగలడు. స సర్వ విఘ్నైః న బాధ్యతే।। అట్టివాడు విఘ్నములుచే బాధించుబడడు. తలపెట్టిన కార్యక్రమములను నిర్విఘ్నముగా నిర్వర్తించగలడు.

తత్త్వార్ధమును ఎరిగి గణపతిని ఉపాసించువాడు పంచ మహాపాతకముల దోషముల నుండి కూడా విముక్తుడు అవుతాడు. పగలు చేసిన పాపము రాత్రి (గణపతి) ధ్యానము చేతను, రాత్రి చేసిన పాప దోషము పగలు చేసిన ధ్యానముచే తొలగగలవు. పాపబుద్ధులు తొలగిపోగలవు. శమించగలవు. వ్యతిరిక్త భావాలు సమసిపోగలవు. అట్టివాడు ధర్మ-అర్థ-కామ-మోక్ష చతుర్విధ ఫలములు సిద్ధించుకోగలడు.

ఉదయ - సాయంకాలములు ఇందలి మంత్రములతో గణపతిని ఉపాసించువాడు ‘అపాపి’ అగుచున్నాడు. సమస్త పాపదృష్టులు ఆతనిని విడచిపోగలవు. పుణ్మకర్ముడు, పుణ్యమనస్కుడు కాగలడు.

ఈ ‘అథర్వశీర్షము’ శిష్యుడు కానివానికి (ఆత్మగురించిన అధ్యయన, అభ్యాస దృష్టిలేనివానికి) గురువులు బోధించరు. మోహము చేత (లౌకిక ఉద్దేశ్యములను, ప్రయోజనములను దృష్టిలో పెట్టుకోవటం చేత) - శిష్యలక్షణము లేనివానికి ఇందలి తాత్త్విక రహస్యములను బోధించటము దోషమే - అని చెప్పబడుతోంది.

ఈ ఉపనిషత్‌లో చెప్పబడిన గణపతి మంత్రములను వేయిసార్లు ఉపాసించువాడు కోరుకొన్నది సిద్ధించుకోగలడు.

ఈ అథర్వశిరములోని మంత్ర-ధ్యాన-ఉపాసనా విశేషములతో గణపతిని అభిషేకించువాడు గొప్ప వాక్‌చాతుర్యము పొందగలడు.
అనశ్నుడై (ఉపవాసి అయి, ఆహారము స్వీకరించక) రోజులో నాలుగుసార్లు అధ్యయనము, తత్-జపము నిర్వర్తిస్తూ ఉండగా, ఆతడు అధికాధిక విద్యావంతుడు కాగలడు.

గణపతి బ్రహ్మము యొక్క ఆచరణ విద్య తెలుసుకొనియున్నవాడు ఇక దేనికీ భయపడడు. అభయుడౌతాడు.

ఎవడు శ్రీ వరసిద్ధి గణపతిని దూర్వార (గరిక) అంకురములలో పూజిస్తాడో, … అట్టివాడు వైశ్రవణునితో (విశ్రవోబ్రహ్మకుమారునితో /కుబేరునితో) సమానుడౌతాడు.

లాజలతో (వట్టివేర్లు, పేలాలు, నానబియ్యముతో) హోమము చేయువాడు గొప్ప యశోవంతుడు, మేధావి కాగలడు.

వేయి మోదక పత్రములతో (తాములపాకులతో) పుష్పములతో గణపతిని పూజించువాడు కోరుకొన్న ఫలము పొందగలడు.(మోదకము = కుడుము అని కూడా అర్థము కలదు)

నేయిలో తడిపిన సమిధలతో గణపతి హోమము చేయువాడు సమస్తము పొందగలడు.

ఎనిమిది మంది బ్రాహ్మణులతో (లక్షపత్రితో కూడిన) గణపతి హోమ నిర్వహణచే సమ్యక్‌గ్రాహి (ఆత్మ గురించిన జ్ఞానము), సూర్యునితో సమానమైన తేజస్సు పొందగలరు.

సూర్యగ్రహణ సమయంలోను, పవిత్ర నది ఒడ్డున, ప్రతిమా సన్నిధియందు జపము చేయువాడు - మంత్ర సిద్ధి పొందగలడు. సమస్త విఘ్నములనుండి విముక్తుడు కాగలడు. దోషము లెటువంటివైనా సరే తొలగిపోతాయి. సమస్తము ఎరిగినవాడు కాగలడు.

గణపతి యొక్క యోగాత్మతత్త్వము ఎరిగినవాడు స్వస్వరూపాత్మతత్త్వమును స్వానుభవముగా ఎరుగగలడు.

తత్త్వమ్ - సోఽహమ్ భావములను స్వాభావికము, అనునిత్యము చేసుకోగలడు.